Suxufiyiin reer Somaliland ah oo ka hadlay Warar siyaabo kala duwan looga baahiyay
| Hargeysa (Somaliland.Org)- Koox Suxufiyiin reer Somaliland ah oo dhawaan ay suurtogeli wayday inay tegaan dalka Kenya, halkaas oo la filayay inay kaga qayb galaan Shir la xidhiidha arrimaha Saxaafadda xorta ah, ayaa ka hadlay Warar siyaabo kala duwan looga faafiyay socdaalkoodaas. Suxufiyiintan oo Lix xubnood ah, isla markaan ka kala socday lix ka mid ah Hay'adaha Warbaahinta ee Madaxa bannaan, ayaanay u suurtogelin inay ka qayb galaan Shirkaas, ka dib markii laga soo celiyay dalka Uganda. Warsaxaafadeed ay arrimahaa kaga hadlayaan oo ay ka soo saareen Magaalada Hargeysa, ayaa wuxuu u dhignaa sidan; "Ujeedada shirka: 27-kii bishii November ee 2009-ka, waxa magaalada Nairobi ee caasimada dalka Kenya ka furmayay shirk u saabsanaa horumarinta saxaafada ka hawl-gasha deegaanada afka Soomaaliga lagaga hadlo, waxaana shirakaas soo qabanqaabisay Hay'ada Press-Now oo ka dhisan dalka Holand, kaasoo lagu casuumay saxafiyiin ka kala socotay Jabuuti, Somaliland iyo Soomaaliya. Dhinaca dalka Somalililand waxa laga martiqaaday 10 suxufi oo ka kala hawl-gala hay'adaha warbaahinta madaxa-bannaan iyo kuwa dawliga ah. Hasa yeeshee, waxa shirkaa ka qaybgalkiisu ay u suuragashay laba Suxufi oo kala ah Guddoomiyaha ururka Suxufiyiinta Somaliland ee SOLJA Mustafe Caddi Ciise (Shiine) iyo Agaasimaha Raadyow Horyaal Maxamed Cusmaan Mire (Sayid), kuwaasoo document-yadooda socdaalka sii gudbiyay furitaankii shirka muddo ka hor, balse lix ka mid ah suxufiyiintas ayaa shirkaa uga baaqday arrimo dhinaca socdaalka la xidhiidhay, halka laba xubnood oo warbaahinta dawladda ka socday ay iyagu uga baaqsadeen arrimo shaqsiyadeed. Sla markaana waxa xusid mudan inay Wasaarada Warfaafintu ka warqabtay shirkaasi. Waxa marag-ma-doon ah in saxafiyiinta ka hawlgalasha warbaahinta madaxa-banaan ayna dhicin wax male-awaal iyo iska-dhaqaaq ah oo ay ugu kicitimeen shirkaasi, taasoo ay cadayn u tahay in keliya kharashka ku baxay uu gaadhayo toban kun oo dollar ($10,000) iyaga oo ka amba-baxay maalin cad madaarka Egal International Airport ee magaalada Hargeysa, iyada oo uu u dhamaystiranaa dekumentiyadoodii sharci, balse qadar Alle iyo arrin caado ah oo caalamka aan ku cusboonayn awgeed ay xayiraadi ku timi Madaarka Entebbe ee dalka Uganda, taasoo sababtay inaanu dhamaantayo gaadhnay go'aan ahaa inuu dalkaasi sida ugu dhakhsaha badan noogu soo celiyo dalkayaga. Intaa ka dibna, si raaxo lahayd ayaanu ugu sugnayn madaarka Addis Ababa ilaa laga gaadhay dedaal badan ka dib inaanu dalkayaga si nabadgelyo ah ugu soo noqono Axaddii la soo dhaafay. Qofkii caqli iyo aqoon Illaahay siiyay, wuu garanayaa, isla markaana wuu dareemayaa in soo-celinta iyo xanibaada noocan oo kale ahi ay caalamka ka dhacdo, sidoo kalena ay hore ugu dhacday dad naga magac wayn annaga iyo kuwo kaleba, isla markaana dib ugu dhici doonto qaar kale. Hase ahaatee, waxay is-waydiintu tahay, 'Waa maxay, sababta ay xasaasiga u noqotay arintani, isla markaana horseeday inay warbaahinta afka xukuumada ku hadasha iyo kuwa taageeraaba ay si xaqiiqada ka fog ugu faafiyeen, bulshadana ugu gudbiyaan warar xaqiiqada ka fog'? Miyaan la odhan karayn, waxa loola jeedaa abuuritaanka khilaaf iyo is-maandhaaf laga dhex abuuro warbaahinta, iyadoo la adeegsanayo ashkhaas ku caan-baxay si-xun wax-u-sheega, si gaar ahna dano-shaqsiyadeed dhaafsada sharafta iyo karaamada saxaafadda. Ujeedada wararkan ka fog xaqiiqada laga leeyahay: Waxaanu u aragnaa sababta loo dhalan-rogayo dhacdadani inay tahay laba qoddob; Waa mida hore'e inay hordhac u tahay shirqool iyo wanjalaad la doonayo in loo maleego labada xubnood ee shirka ka qaybgalay iyo; In la diidan yahay oo laga masayrsan yahay horumar saxafyiintu sameeyaan. Faafinta Wargeyska Haatuf: Wargeyska Haatuf oo cadadkiisii soo baxay Salaasada 01/12/2009 ee shalay ku faafiyay inay weriyeyaal reer Somaliland ahi tahriib ugu safrayeen shir ka dhacayay Nairobi, sideedaba maaha arrin jirta, isla markaaa waa been-abuur xaqiiqada ka fog, iyada oo qof caqliga lihi uu garan karo in weriyeyaal dalkooda sharaf ku haysta aanay suuragal ahayn xiisena aanay u haynin tahriib a u galaan wadanka Kenya. Balse, warkan uu Wargeysku faafiyay loo arki karo mid uu isagu dan gaar ah ka leeyahay, taasoo cadaynaysa inay tahay dhaqan ku cusub warbaahinta dalka Somaliland balse wargaysku uu caadaysatay iyada oo uu hore gef saxafinimo uga galay wariye xasan saciid oo ku hamiyay in uu dalkiisa komishaneernimo ugu adeego. Sidoo kale, Wargeyskani waxa uu hore gef-saxaafadeed uga galay Wargeysyada Madaxa-banaan qaarkood. Ka suxufiyin ahaan, anaga oo tixgelin dheeraad ah siinayna xirfadayada, dabaqaynana mihnada saxaafadeed, waxaanu ka soo horjeednaa magac-dilka, been-abuurka iyo danaystenimada shaqsiyadeed, isla markaana waxaanu cadaynanaa in wargeyskaasi uu xuquuqdayadii muwaadinnimo iyo tii saxaadeedba meel kaga dhacay. Waxaananu Xukuumadda, Bahda Warbaahinta, Shacbiga Somaliland iyo cid kasta oo ka damqata jiritaanka madaxbanaanida Somaliland aanu ka tacsiyadaynaynaa gefka been-abuurka ah ee wargeyskaasi sameeyay. Gebogebo iyo soo-jeedin: Eedaynta la xidhiidha inuu shirku guuldaraystay iyo inuu ku dhamaaday natiijo la'aan, taas bedelkeeda waxa jawaab u noqon doonta midhaha ka soo baxa iyo qoddobadii shirkaa lagaga dhawaaqay oo aanu ognahay in faa'iido iyo dan wax-ku-ool ahi ugu jirto saxaafadda Somaliland. Iyada oo aanaan dhiirigelinayn yooyootan ka bilaabma saxaafadda dhexdeeda, Wargeyska Haatuf waxaanu u soo jeedinaynaa inuu ilaaliyo sharafta saxaafadeed ee isagu huwan yahay, isla markaana aanu noqonin faash loo adeegsado magac-dilida, kala-qaybinta, boqno-goynta iyo wanjalaada suxufiyiinta iyo hay'adaha warbaahinta. Magacyada Suxufiyiinta: 1- Cabdiweli Faarax Jaambiir—– Wargayska Ogaal 2- C/shakuur X. Muxumed Muuse [Heersare] — Oodweynenews.com 3- Cabdixakiim Maxamuud Shirwac [Horn Cable TV]. 4- Cabdiqani Xuseen Baynax—– Somalilandprees.com 5- Cabdifataax Ismaaciil Mursa—Hadhwanaagnews.com 6- Cabdiraxmaan Cismaan Muuse— TV-ga SLSC Somaliland.Org Hargeisa News Desk |
No comments:
Post a Comment